Дэлхийн шилдэг эрдэмтэн залуусын оюуны бүтээлийг олон улсад танилцуулахын зэрэгцээ орон орны эрдэмтдийн мэдлэг, шинэ туршлагаа солилцох талбар болдог Falling Walls Lab Mongolia’21+ENGAGEx нээлттэй форум 10-р сарын 1, 2-ны өдрүүдэд амжилттай болж өндөрлөлөө.
Танхим – цахим хосолсон хэлбэрээр явагдсан уг форумын эхний өдөр Falling Walls Lab Mongolia’21 болон Lab-Engage-Collider Mongolia хэсэг зохион байгуулагдсан байна. Тус форум нь Монгол Улсад хоёр дахь удаа амжилттай зохион байгуулагдаж байгаа бөгөөд энэ өдөр шилдэг оролцогчдоо шалгарууллаа.
Falling Walls Lab Mongolia’21 форум бүхий л салбарын эрдэмтэн, бизнес эрхлэгч, мэргэжилтнүүдийг өөрийн судалгааны ажил, бизнесийн загвар, дэвшилтэт технологи, шинэлэг төсөл, санаагаа шүүгчид болон бусад мэргэжилтнүүдэд 3 минутын дотор багтаан танилцуулах боломжийг олгож буйгаараа онцлогтой. Форумд Монголын залуу судлаач, шинийг санаачлагчдаас гадна Ирланд, Пакистан, Гана, Шинэ Зеланд улсаас залуу эрдэмтэд оролцож, бүтээлүүдээ танилцуулсан юм.
Форумын илтгэлүүд байгаль орчинд ээлтэй, хүний эрүүл мэндэд тустай, хөдөлмөрийг хөнгөвчлөх зорилготой бүтээлүүд, шинэ санаануудаар баялаг байлаа. Тухайлбал, Монгол судлаачид уламжлалт аргаар тусгай савлагаа бүхий эрүүл мэндийн бүтээгдэхүүн үйлдвэрлэх санал, хонины ноосон материалыг ашиглан дотоод орчны агаарын бохирдлыг бууруулах шинэ технологи, тогтвортой санхүүжилт хяналтын сайжруулсан тогтолцоо бүхий хүүхэд хамгааллын байр, өөрийн улс орны давуу тал, нөөц боломжийг үр дүнтэй ашиглах боломжууд, Монгол орны ирээдүйн эрчим хүчний төлөвлөгөөг танилцуулсан юм.
Түүнчлэн Пакистаны оролцогч Aniqa Mazhar өөрийн улс оронд шинжлэх ухаан технологийг хөгжүүлэхийн тулд шинжлэх ухааны мэргэшсэн сэтгүүлзүйг бий болгох, дэмжих нь зүйтэй байгааг онцолсон. Харин Шинэ Зеландын оролцогч Navid Majdi цахилгаан эрчим хүчийг бууруулах оффшор эх үүсвэрийг нэгтгэх цогц төлөвлөгөө, Ирландын оролцогч Ammar Abbas хиймэл оюун ухаанаар дамжуулан далд мэдлэг олж авах аргачлалаа эрдэмтэн судлаачид, инженер технологийн салбарын оюутнууд, мөн форумын шүүгчдийн өмнө танилцууллаа.
Falling Walls Lab Mongolia’21 форумын Үндэсний ялагч ба шилдэг бүтээлийн эзэд
Форумын шүүгчдийн багт МГТИС-ийн Математик, компьютер, байгалийн ухааны факультетийн декан Проф. Др. Н.Баттулга, МУИС-ийн Хүрээлэн буй орчин, Ойн инженерчлэлийн сургуулийн профессор Др. Ч.Сономдагва, МУИС-ийн Хэрэглээний шинжлэх ухаан, инженерчлэлийн сургуулийн харъяа. “Нано шинжлэх ухаан, нанотехнологийн төв”-ийн Захирал Др. Ч.Ганзориг, ШУТИС-ийн Компьютерийн Ухааны салбарын дэд профессор И.Цэрэн-Онолт, СЭЗИС-ийн Бизнесийн удирдлагын доктор (Ph.D), дэд профессор Г.Батхуяг, ХААИС-ийн ХАА-н ШУЗ-ийн ажлын албаны дарга Др. Б.Баярмаа болон МГТИС-ийн Хэл, заах аргазүйн төв, Германы эрдмийн солилцооны албаны (DAAD) багш Яан Тростман нар ажиллалаа.
Шүүгчдийн зүгээс форумд танилцуулсан бүтээлүүдийг сайтар судлагдсан байдал, туршилт үр дүн, хэрэгжүүлэх боломж нөхцөл, хэрэглээнд нийцсэн эсэх шаардлагаар нь эрэмбэлэн, шалгаруулдаг. Ингээд форумын гуравдугаар байрын шагналыг оролцогч Ammar Abbas “Breaking The Wall of Latent Knowledge Discovery Through AI”, хоёрдугаар байрын шагналыг оролцогч М.Батмөнх “Breaking The Wall of Traditional Functional Drinks” илтгэлээрээ хүртсэн бол оролцогч М.Оюунгэрэл “Breaking The Wall of Indoor Air Pollution” бүтээлээрээ тэргүүн байрын цомын эзэн болж, Falling Walls Lab Mongolia-ийн Үндэсний ялагч боллоо.
Үндэсний ялагч Монгол Улсаа төлөөлөн энэ оны 11-р сарын 8, 9-ний өдрүүдэд Берлин хотноо зохион байгуулагдах Falling Walls Lab Int. Finale-д олон улсын 100 гаруй үндэсний ялагчтай өрсөлдөх эрхийг авав. Бүх олон улсын Лаб финалистууд Falling Walls Science Summit-д сонсогчоор оролцох эрхтэй ба олон улсын ялагч нь мөнгөн шагнал хүртэх юм.
Энэхүү эхний өдрийн арга хэмжээний төгсгөлд болон хоёр дахь өдөр нь зохион байгуулагдсан ENGAGEx шинжлэх ухааны харилцаа холбоо, оролцоог идэвхжүүлэх семинар, нээлттэй хэлэлцүүлгийн зочноор Falling Walls Engage Community-ийн гишүүн олон улсын таван мэргэжилтэн, INWES – Олон улсын эмэгтэй инженер, эрдэмтдийн холбооны төлөөлөл, Falling Walls Lab Mongolia’19 Labster, Engager-үүд зэрэг Монголын болон олон улсын мэргэжилтэн, багш, эрдэмтэн судлаачид уригдан туршлага солилцож, нээлттэй хэлэлцүүлэг идэвхтэй өрнүүлсэн юм.
Олон улсын эрдэмтдийн туршлага солилцох Falling Walls ENGAGEx
Нээлттэй форумын хоёр дахь өдөр зохион байгуулагдсан Falling Walls ENGAGEx бол дэлхийн өнцөг булан бүрт байгаа олон нийт, иргэдийг шинжлэх ухаанд идэвхтэй оролцуулдаг, нийгмийн сайн сайхан, хөгжлийн төлөө хувь нэмэр оруулж буй төсөл, судалгаа, үйл ажиллагаа явуулж буй байгууллага, идэвхтэй ба бүтээлч хувь хүн, мэргэжилтэн, баг хамт олонд урам зориг өгч, тэднийг холбох, тогтвортой сүлжээг бий болгох, харилцан нөлөөллийг олон улсын хүрээнд сурталчлан таниулахад чиглэсэн 2018 оноос хойш зохион байгуулагдаж буй дэлхийн платформ юм.
Энэ өдөр Falling Walls Lab Engagex арга хэмжээнд Ирланд, Энэтхэг, Египет, Финланд, Герман болон Монголын эрдэмтэн судлаачид оролцож, байгалийн ухаан болон инженер технологийн мэргэжилд хүүхдүүдийг багаас нь хэрхэн сонирхолтой болгох, сургалтын дэвшилтэт арга барил, олон улс дахь эмэгтэй инженерүүдийн идэвх оролцоо, шинжлэх ухааны салбарынхныг холбон мэдээлэл дамжуулахад салбарын тогтмол сэтгүүлийн гүйцэтгэх үүрэг гэхчлэн олон талт асуудлыг хөндөн хэлэлцлээ.
Тус арга хэмжээний их сонирхолтой хэсэг нь яруу найргийн хэсэг байлаа. Шинжлэх ухааны нарийн асуудлуудыг судлан бүтээл туурвидаг хэдий ч, урлагт хайртай, яруу найраг сонирхдог олон судлаач дэлхийн болон өөрийн улс орны алдартай шүлэг бүтээлүүд уншин сонирхуулсан юм. The Night Poetry сүлжээний монгол судлаач залуус энэхүү хэсэгт өнгө нэмж, дэмжлэг үзүүлэн оролцсон ба хоёр өдөрт хэлэлцсэн сэдвүүдийг хөндөн шинээр зохиосон шүлэг найраглалаа толилуулж их анхаарал татав.
Энэхүү танхим-цахим хосолсон Falling Walls Lab Mongolia’21+ENGAGEx нээлттэй форум арга хэмжээг “Соёл урлаг, хэвлэл мэдээллийн төслийн менежмент, зөвлөгөө” НҮТББ (AMPMC), Монгол-Германы хамтарсан ашигт малтмал, технологийн их сургууль (GMIT) ба Монгол Улсын их сургууль (МУИС) хамтран, Falling Walls Сан, Монгол Улс дахь ХБНГУ-ын ЭСЯ, ХБНГУ дахь Монгол Улсын Соёлын Элч О.Оюунтуяа, Олон улсын инженер, эрдэмтэн эмэгтэйчүүдийн сүлжээ (INWES) болон Night Poetry-ийн дэмжлэгтэйгээр зохион байгуулав.
Дэлгэрэнгүй мэдээллийг www.falling-walls.com/lab болон fb.me/FallingWallsLabEngageMongolia хуудаснаас авна уу.
Falling Walls Lab Mongolia’21+Engagex нээлттэй форумын тухай цөөн үгээр
– Хүндэт зочид ба зохион байгуулагчид –
Форумын нээлтэд ХБНГУ-аас Монгол Улсад суугаа Элчин сайд Ёорн Розенберг:
“Герман улсад анх санаачилсан энэ арга хэмжээ нь дэлхийн улс орнууд дахь судлаачид, бизнес эрхлэгчид, шийдвэр гаргагчид, уран бүтээлчид, сэтгэгчид болон хөдөлгөгч хүч болсон хэсэг хүмүүсийн өөрчлөлт эрэлхийлсэн санаа, санаачилгыг нийгэмд нэвтрүүлэхийг зорьсон хамтын хүчин зүтгэл юм. Том асуудлыг хэн ч ганцаарчлан шийдэх боломжгүй байдаг. Тиймээс ч бид Falling Walls-ийн Монгол дахь түнш байгууллагууд, оролцогчид чин сэтгэлийн хүчин чармайлт гаргаж байгаад баяртай байна. Өнөөдөр бидэнд олон сонирхолтой санаа, санаачилга танилцуулсан Монголын оролцогчдод Берлин дэх Falling Walls Бага хурлын индэр дээр өндөр амжилт гаргахыг хүсэн ерөөе!” гэсэн юм.
Олон улсын эмэгтэй инженер, эрдэмтдийн холбооны (INWES) ерөнхийлөгч Проф. Жүн Сүн Ким:
“INWES нь эмэгтэйчүүд, охидыг дэлхийн түвшинд шинжлэх ухаан, технологи, инженерчлэл, математикийн ухааны салбарт өндөр оролцоотой байхыг чин сэтгэлийн гүнээс дэмжиж буйгаа илэрхийлье. Илүү сайн сайхан ирээдүйг бүтээхийн төлөөх шинэлэг санаануудаа даян дэлхийд дэлгэн харуулцгаа!”
Монгол улсын Соёлын элч, AMPMC NGO үүсгэн байгуулагч, хатагтай О.Оюунтуяа:
“Falling Walls нь нийгэм, эдийн засгийн ач холбогдолтой, бодит үр дүн авчрахуйц шинжлэх ухаан, инновацын дэвшилтэт санаачилгуудыг хэрэгжүүлэхэд чухал нөлөөтэй олон улсын цуврал арга хэмжээ юм. Энэ үеэр эрдэмтэн судлаачид оюуны бүтээл, шинэ санаачилгаа танилцуулдаг бол бизнес эрхлэгч, хөрөнгө оруулагч, шийдвэр гаргагчид тэдгээр бүтээлийг нийгэмд хүргэх гол алхмыг хийдэг.
Бодит үр дүн авчирдаг учраас Falling Walls арга хэмжээний платформуудыг 2019 оноос хойш Монголдоо тогтвортой зохион байгуулж залуу эрдэмтэн судлаачдад шинэ нээлт, шинэлэг санаагаа танилцуулах, харилцан туршлага солилцох өргөн боломжит тайзыг жил бүр бүрдүүлэхийг хичээн ажиллаж байна. Түүнчлэн дэлхий дахин сорилт бэрхшээлтэй тулгарч буй энэхүү цаг үед хил дамнасан, салбар дундын өргөн хүрээтэй шинжлэх ухааны хамтын ажиллагааны ач холбогдол нь тодорхой байна.
Энэ удаагийн Falling Walls Lab форумыг ENGAGEx семинартай хослуулан зохион байгуулснаар “Лаб”-д оролцогчид, монгол залуу эрдэмтэн судлаачид маань өөрсдийн судалгааны төсөл, бүтээлээ зорилтот салбарынханд хэрхэн хүргэх талаар шинжлэх ухааны харилцаа, холбооны чиглэлээр туршлагатай олон улсын мэргэжилтнүүдээс суралцан, харилцан туршлага солилцох боломжийг өгснөөрөө онцлогтой.
0 cэтгэгдэлтэй