МГЗНХ: Гэрэл зургийн сурвалжлагчдыг Чуулганы нэгдсэн хуралдаанд оруулж, ажлаа хийх боломжоор хангахыг ШААРДАЖ байна

Хэвлэл мэдээллийн гэрэл зурагчид буюу гэрэл зургийн сурвалжлагчдыг 2025 оны тавдугаар сарын 15-ны өдрөөс эхлэн УИХ-ын чуулганы нэгдсэн хуралдаанд оруулахыг хориглосон шийдвэрийг УИХ-ын дарга Д.Амарбаясгалан гаргасан юм.

Тодруулбал, УИХ-ын Тамгын газрын дарга Э.Болортуяа Их хурлын танхим руу нэвтрэх ажилтнуудын нэрс гэдгийг гаргасан юм.

Мэдээллийг хавсаргав.

Иймд Монголын гэрэл зурагчдын нэгдсэн холбоо дараах шаардлагыг УИХ-д суудалтай намын дарга нарт болон УИХ-ын ерөнхий нарийн бичгийн дарга Б.Баасандоржид хүргүүлээд байна.

ШААРДЛАГА

“Монгол Улсын гэрэл зургийн салбар өдгөө 90 жилийн түүхтэй. Өнгөрсөн хугацаанд Монголын гэрэл зурагчид тэр дундаа хэвлэл мэдээллийн гэрэл зурагчид улсын хөгжил, нийгэм, улс төрийн үйл ажиллагааг баримтжуулан үлдээх хариуцлагатай үүргийг гүйцэтгэсээр ирсэн билээ.

Гэтэл 2025 оны тавдугаар сарын 15-аас хэвлэл мэдээллийн гэрэл зурагчдыг чуулганы нэгдсэн хуралдаанд орохыг хориглосон шийдвэрийг УИХ-ын дарга Д.Амарбаясгалан гаргасан нь төр, засгийн үйл ажиллагааны нээлттэй байдлыг хаасан, нөгөөтэйгүүр хэвлэл, мэдээллийн хэрэгсэл өөрөөр хэлбэл сэтгүүлчийн мэдээ, мэдээлэл авах, хэвлэн нийтлэх эрх чөлөө, улмаар иргэдийн мэдэх, мэдээллээр хангагдах гэсэн үндсэн хуулиар олгогдсон эрхүүд нэгэн зэрэг хөндөгдсөн учир дээрх шийдвэрийг Монголын Гэрэл зурагчдын нэгдсэн холбооны зүгээс эсэргүүцэж байна.

Иймд Та энэхүү шийдвэрийг эргэн харж, гэрэл зургийн сурвалжлагчдын ажил үүргээ гүйцэтгэх боломж, эрхийг хангаж өгөхийг шаардаж байна”.

МГЗНХ-НЫ ЕРӨНХИЙЛӨГЧ Л.ЖАРГАЛСАЙХАН