Б.ГҮРСОРОНЗОН: 2023 оны хоёрдугаар улирлаас С зөвшөөрлийг И-Монголиагаар олгоно

Автотээврийн Үндэсний төв ТӨҮГ-ын  захирал Б.Гүрсоронзонтой тээврийн хэрэгслийн бүртгэл, цахимжуулалт зэрэг цаг үеийн асуудлаар ярилцлаа.

-Өнөөдрийн байдлаар жолооч, тээвэрчид, иргэд танай ямар үйлчилгээнүүдийг цахимаар авах боломжтой  байна вэ?

-Улс, хот хоорондын зорчигч болон ачаа тээврийн үйлчилгээ, тээврийн хэрэгслийн бүртгэл, техникийн үзлэг, мэргэшсэн жолоочийн мэдээлэл шалгах, улсын дугаар захиалах, дотоодын ачаа тээвэр, бүртгэлтэй холбоотой төлбөр төлөх гэсэн үндсэн үйл ажиллагааг цахимаар явуулж байгаа. Ер нь цахимжуулах ажил 2001 оноос эхэлж 2021 оноос хойш эрчимтэй цахимжуулж эхэлсэн. 2023 оныг Зам, тээврийн хөгжлийн яамнаас БҮРЭН ЦАХИМЖСАН, БҮТЭЭМЖИЙГ НЭМЭГДҮҮЛЖ ҮР ДҮНГ ТООЦОХ ЖИЛ болгон, салбарын хэмжээнд НЭЭЛТТЭЙ, ИЛ ТОД, төрийн үйлчилгээг иргэддээ шуурхай хүргэх зорилт тавьсан. Үүний дагуу цаашид  ч цахимжуулах ажил үргэлжилнэ.

ТЭЭВРИЙН ХЭРЭГСЛИЙН УЛСЫН ДУГААР, ҮНЭМЛЭХЭЭ ХҮРГҮҮЛЭН АВНА

–Тухайлбал?

-2023 ондоо хэрэглэгчдэд хүрдэг автотээврийн салбарын бүхий л үйлчилгээг цахимжуулахыг зорин ажиллана. 2022 оны аравдугаар сараас эхлэн мэргэшсэн жолоочийн үнэмлэх сунгалтын шалгалтыг цахимжуулсан. Сайжруулалтаа одоо хийж байна. Шинээр тээврийн хэрэгсэл бүртгүүлэх, шилжүүлэх үйл явцыг хэн нэгэн мэргэжилтний оролцоогүйгээр бүрэн цахим хэлбэрт оруулна. Хүлээн авагч, өмчлөгч нар харилцан зөвшилцсөний үндсэн дээр бүртгэлээ шинэчлэн тээврийн хэрэгслийн улсын дугаар, үнэмлэхээ шуудангийн хаягаар хүргүүлэн авах зохицуулалт хийнэ. Autobox.mn,  Autobox аппликейшн шинээр нэвтрүүлэн, хөгжүүлэлт хийж байна. Ойрын хугацаанд ашиглах боломжтой болчихно. Тус аппликейшнаар дамжуулан дээрх бүх үйлчилгээг авч болно.

-Ачаа тээврийн С зөвшөөрлийг хэрхэн олгож байна?

-С зөвшөөрлийг И-Монголиа платформтой бүрэн холбосон. Хэрэглэгч, аж ахуйн нэгжийн хүсэлтийг тус платформоор дамжуулан авч, зөвшөөрлийг нь хэвлэн өгч байна. 2023 оны хоёрдугаар улирлаас Эрдэнэс тавантолгой ХХК, орон нутгийн Тавантолгой, Энержи Рэсурс ХХК-иас бусад бүх боомтоор явж байгаа тээврийн С зөвшөөрлийг И-Монголиагаар олгоно.

ШИНЭЧИЛСЭН БҮРТГЭЛ ХИЙХЭД ИРГЭДЭДЭЭС ТӨЛБӨР АВАХГҮЙ, ЧИРЭГДЭЛ УЧРУУЛАХГҮЙ

-Тээврийн хэрэгслийн шинэчилсэн бүртгэлийн зорилго, ач холбогдлын талаар?

-2022 оны арванхоёрдугаар сарын 31-ны өдрийн байдлаар бүртгэлийн санд 1.267.000 мянган тээврийн хэрэгсэл бүртгэлтэй байна. Эдгээрээс 797 мянга нь буюу  63 хувь нь техник, хяналтын үзлэгт орж байна. Үлдсэн 37 хувь нь техник, хяналтын үзлэгтээ ороогүй. Тэгэхээр эдгээрийг эцэслэн тогтоохоор шинэчилсэн бүртгэл хийж байна.

Ингэснээр манай байгууллагын хувьд бүртгэлийн сангаа цэгцлэх, тээврийн хэрэгслийн мэдээлүүд тодорхой болох юм. Харин иргэдэд олон жилийн өмнө ашиглахгүй болсон тээврийн хэрэгслээ хасуулах боломжтой. Зарим иргэд худалдах, худалдан авах гэрээ хийсэн ч нэр шилжүүлээгүй байдаг. Үүнийг ч гэсэн шинэчилсэн бүртгэлээр цэгцэлчихнэ. Шинэчилсэн бүртгэл хийж байна гээд иргэдээс төлбөр авах, чирэгдэл учруулах ямар ч шийдвэр гаргахгүй гэдгийг онцлон хэлье.

АЯЛАЛ ЖУУЛЧЛАЛЫН ЦОГЦОЛБОР БАЙГУУЛСНААР ИРГЭД АЯ ТУХТАЙ ҮЙЛЧЛҮҮЛЭХ ХЭРЭГЦЭЭТ БҮХ ҮЙЛЧИЛГЭЭГ БАГТААНА

–Орон нутгийн авто зам дагуу шинээр 10 байршилд аялал, жуулчлалын цогцолбор байгуулахаар сонгон шалгаруулалт зарласан. Орон нутгийн иргэд, жолооч тээвэрчид, иргэдэд ямар ач холбогдолтой вэ?

–Монгол Улсын Засгийн газрын 2020-2024 онд хэрэгжүүлэх үйл ажиллагааны хөтөлбөрт тусгагдсаны дагуу Аялал жуулчлалын гол чиглэлийн авто зам дагуу 170-250 км тутам, нийт 35 байршилд стандартын шаардлага хангасан үйлчилгээний цогцолбор байгуулах ажлыг эхлүүлсэн. Түүнчлэн одоо ажиллаж байгаа авто замын төлбөр авах цэгүүдийн үйл ажиллагаатай уялдуулан нэмж, 10 байршилд сонгон шалгаруулалтыг Зам, тээврийн хөгжлийн яамнаас зарлаад байна.

Авто замын дагуу  170-250 км үйлчилгээний цогцолбортой болсноор гадаад, дотоодын жуулчид, зорчигчдын ая тухтай цайны газар, зочид буудал, орчин үеийн бие засах газар, кофешоп, хүнсний дэлгүүр, эмийн сан зэрэг иргэдэд хэрэгцээтэй бүхий л үйлчилгээг нэг дор төвлөрүүлэх юм.

-Шинээр аялал жуулчлалын төв байгуулах байршлын хувьд. Мөн ямар шаардлага тавих вэ?

-Увс аймгийн Наранбулаг сум, Ховд аймгийн Булган сум, Өмнөговь аймгийн Ноён сум, Хөвсгөл аймгийн Хатгал сум, Дорноговь аймгийн Айраг, Замын-Үүд сум, Сүхбаатар аймгийн Эрдэнэцагаан сум, Дархан-Эрдэнэтийн уулзвар, Өвөрхангай аймгийн Элсэнтасархай, Дорнод аймгийн Мэнэнгийн тал зэрэг 10 байршилд шинээр байгуулахаар урьдчилан тогтсон. Үйлчилгээний цогцолбор хоорондын зай 170-250 км, 24 цагийн үйл ажиллагаатай, интернет болон гар утасны сүлжээнд холбогдсон, ашиглалтын хугацаа 15 жилээс дээш, замын үзэгдэлт хангалттай газарт байрлах, хөдөлгөөний аюулгүй байдлыг хангасан орц, гарцтай, замаас 50 метрээс багагүй зайд байх ёстой.

-Цахимжуулалт, шинэчилсэн бүртгэл, аялал жуулчлалын төвөөс гадна өөр юу хийхээр төлөвлөсөн бэ?

 -Автотээврийн хэмжээг нэмэгдүүлэх, тээврийн хэрэгслийн техникийн хяналтын үзлэгийн чанар хүртээмжийг нэмэгдүүлэх, бүртгэл хяналтын тогтолцоог боловсронгуй болгох, улс хоорондын тээврийн эрх зүйн орчныг сайжруулах, төр хувийн хэвшлийн түншлэлийн хүрээнд автотээврийн дэд бүтцийг хөгжүүлэх, автотээврийн үйлчилгээг бүрэн цахим хэлбэрт шилжүүлнэ гэсэн үйл ажиллагааны үндсэн таван зорилт тавин Зам, тээврийн хөгжлийн сайдаар батлуулсан. Тавьсан зорилтуудаа бүрэн дүүрэн биелүүлж, ажил хэрэг болгон, иргэд, тээвэрчиддээ төрийн үйлчилгээг шуурхай, хүндрэлгүй хүргэхийн төлөө шат шатандаа хичээн ажиллана.